ಉರಿಮೂತ್ರದ ಮಹಿಮೆ!
ಕ್ಷಮಿಸಿ ಉರಿಮೂತ್ರವಾದಾಗ ಬರೆಯ ಹೊರಟೆ
ಬಂದಿದ್ದು ಒಂದೊಂದೇ ಹನಿ ! ಅದೂ ಉರಿಯುತ್ತಾ ಉರಿಸುತ್ತಾ
ಏನೂ ಮಾಡಗೊಡದ ಸ್ಥಿತಿಗೆ ತಳ್ಳುವಂತೇ
ಆಗೊಮ್ಮೆ ನೋವಲ್ಲೂ ದೇಶದ ನಕಾಶೆಯ ನೆನಪಾಗಿ
ಆ ನಡುವೆ ಕಾವೇರಿಯ ಹರವು ಹರಿವೂ ನೆರವಾಗಿ
ಕಂಡೆ ತಮಿಳುರಾಜ್ಯವ ಬಿರುಬೇಸಿಗೆಯಲ್ಲಿ ಬತ್ತಿಹೋಗಿ
ನನ್ನಂತೇ ಅಲ್ಲಿ ಉಂಟುಮಾಡಿರಬಹುದೇ ಹಲವರಿಗೆ ಉರಿಮೂತ್ರವ ?
ಕತ್ತುಮೇಲೆತ್ತಿದರೆ ರಾಜಸ್ಥಾನದಿ ಕಣ್ಣು
ಎಡಕ್ಕೆ ಚಲಿಸಿದರೆ ಆಂಧ್ರದಲ್ಲೂ ಅದೇ ಹುಣ್ಣು!
ಗುಜರಾತಿನಲ್ಲೂ ಬಹುತೇಕ ನನ್ನ ಪಂಗಡವೇ !
ನೀರಿಲ್ಲದೂರಿನಲಿ ದೂರುವುದು ಯಾರಲ್ಲಿ ?
ಮತ್ತೆ ಆ ಭಗೀರಥ ಹುಟ್ಟಿಬರನೇ ?
ಗಾದೆ ಬದಲಾಗಿದೆ!
ಸಮುದ್ರದ ನಂಟು ಸಿಹಿನೀರಿಗೆ ಬಡತನ !
ನಗಬೇಕಾಗಿದೆ ಮಾನವನ ತಾಕತ್ತಿಗೆ
ಕೋಟಿ ಕೋಟಿ ಮುಂಗಡಪತ್ರ ಘೋಷಿಸಿದರೂ
ನೀರನ್ನು ಕೊಂಡು ತರಲಾಗದ ವಿಪತ್ತಿಗೆ !
ಮುಂಗಾರು ಬಂದಿದೆ ಎಂದು ಕೇಳಿದೆ
ಅದಾಗಲೇ ನೋವಿರುವ ಮೂತ್ರನಾಳದಲ್ಲೋ
ಕೋಶದಲ್ಲೋ ತಂಪಿನ ಅನುಭವ !
ಸುರಿಯಲಿ ಮುಂಗಾರು ಭೋರ್ಗರೆದು ಹದದಲಿ
ಹರಿಯಲಿ ನದಿ-ಕೊಳ್ಳ ಸರೋವರಗಳು ತುಂಬಿತುಳುಕಲಿ
ತಣಿಯಲಿ ದಾಹಗೊಂಡ ಈ ನೆಲ
ತಣಿಸಲಿ ಜನಗಳ ಮನ-ಹೊಲ
ನೀಗಲಿ ಉರಿಮೂತ್ರದಿ ಹನಿಯುವ ಉರಿಯುರಿ ಜಲ
Posts
