![](https://blogger.googleusercontent.com/img/b/R29vZ2xl/AVvXsEh23SH8KCqOQRph8T8EvQmLg666e9zIuLCKS0k2udcsxRUWxrkAseG7k9vYj-GEUcNC6w7C4RLh5qlxuAxKLxAdL6LPUZUs8fcg4B8NiQIG91TUM9zZkoVO4fqExzrsy8TT7CYCzOg41wY/s320/shadowkerala_16453.jpg)
![](https://blogger.googleusercontent.com/img/b/R29vZ2xl/AVvXsEiLv21UTmMiBNpRyUZH37Yn0-psyHObwxkx9DODAB1Qg77SsPbVxbmGJNEzpe8WhN_o2fuGft5b_LNmlG11QvOBT9enrqO7bSRi1vAW01nF1kLh8LH-vx6DNXJOJUU6DNXvU037pm3S-74/s320/Gombeyata_14361.jpg)
’ಜೀವನ’
ತೊಗಲು ಗೊಂಬೆಗಳ್ ನಾವು ಹಗಲಿರುಳು ಆಟಗಳು
ನಗುಅಳುಗಳೆಲ್ಲವೂ ಸೂತ್ರಧಾರನದು
ಬಗೆಬಗೆಯ ಪೋಷಾಕು ಹಚ್ಚಿ-ಬಣ್ಣವ ಕುಣಿಸಿ
ನೆಗೆದೆತ್ತಿ ಒಯ್ಯುವನು | ಜಗದಮಿತ್ರ
ಹೆಗಲಿಗೇರಿಸಿ ನೊಗವ ನಡೆಯಲಾಜ್ಞಾಪಿಸುವ
ಬಗಲೊಳಗೆ ಛಾಟಿಯಿದೆ ಎಂದು ಎಚ್ಚರಿಸಿ
ಅಗಲದಾ ಗಾಡಿಯಿದು ಕಿರಿದಾದ ಹಾದಿಗಳು
ಮುಗಿದು ಮುಂದಕೆ ಸಾಗು | ಜಗದಮಿತ್ರ
ಸುಗಮ ಕೆಲವರ ದಾರಿ ದುರ್ಗಮವು ಉಳಿದರ್ಗೆ
ನಿಗಮ ಮಂಡಳಿ ಕಾಯ್ದೆ ನಮಗೆ ಕಾಣಿಸದು
ಉಗಮವಾಗುವ ದುಃಖ ದುಮ್ಮಾನಗಳ ಸಹಿಸಿ
ಜಗದ ಋಣವನು ವ್ಯಯಿಸು | ಜಗದಮಿತ್ರ
ಜಗದಿ ಉತ್ತಮರಿಂಗೆ ಸುಖದ ಬಾಳೆಂದಿಲ್ಲ
ನಗುತ ನಡೆದರ್ ರಾಮ ನಳ ವಿಕ್ರಮರುಗಳು
ಅಗಣಿತ ಜ್ಞಾನವಂ ಪಡೆಯೆ ವಿಶ್ವಾಮಿತ್ರ
ಒಗೆದ ರಾಜ್ಯವ ತಪಕೆ | ಜಗದಮಿತ್ರ
ಹಗೆತನವು ತರವಲ್ಲ ದೊರೆತ ಈ ಜೀವನದಿ
ನಗನಾಣ್ಯ ಜಾಗಗಳು ಬರವು ಜೊತೆಯಲ್ಲಿ
ಹೊಗೆಯುಗುಳಿ ನೀರ್ನುಗ್ಗಿ ನಿಂತ ನೆಲವೇ ಕುಸಿಯೆ
ಹಗುರ ಹೋಗುತ ಭಾರ ! ಜಗದಮಿತ್ರ
ಮೊಗೆದುಣಿಸು ದಯೆ ಕರುಣೆ ವಾತ್ಸಲ್ಯ ಮಮತೆಯಲಿ
ಬಗೆಯದೇ ದ್ರೋಹವನು ನೇರನಡೆಯುತಲಿ
ಯುಗಯುಗಕು ಈ ಜಗವು ಸುಖದಿ ಬಾಳ್ವುದ ಬಯಸು
ಅಗಲುವಿಕೆ ಅನಿವಾರ್ಯ | ಜಗದಮಿತ್ರ