ಆತ್ಮೀಯ ಬಂಧು, ನಮಸ್ಕಾರ, ವಿ.ಆರ್.ಭಟ್ ತಮಗೆ ಹೃತ್ಪೂರ್ವಕ ಸ್ವಾಗತವನ್ನು ಕೋರುತ್ತಿದ್ದೇನೆ

Friday, September 24, 2010

ಮುಸಲಧಾರೆ


ಮುಸಲಧಾರೆ

ಏನಿದೀ ಅಬ್ಬರದ ಕಾರ್ಮೋಡ ಕರಗಿರಲು
ಲಕ್ಷಣವ ತೋರ್ಗೊಡದ ಮುಸಲಧಾರೆ ?
ಭೂಮಿಯಾಕಾಶಗಳ ಬೆಸೆದಂತೆ ನೆಟ್ಟಿರುವ
ತಂತಿ ರೂಪದ ಮಳೆಯ ಧಾರೆ ಧಾರೆ

ಸೃಷ್ಟಿ ಕಟ್ಟಳೆಯಂತೆ ವರುಣ ಭೋರ್ಗರೆದಂತ
ಪ್ರಕೃತಿ ವಿಸ್ಮಯ ರೂಪ ಜಲಲಧಾರೆ !
ಅಷ್ಟದಿಕ್ಕುಗಳಲ್ಲು ಮೋಡಗಳು ಮೇಳೈಸಿ
ಒತ್ತಟ್ಟಿಗೇ ಸುರಿದ ತಂಪುಧಾರೆ

ಇಂದ್ರಸಭೆಯಲಿ ಕೋಪಗೊಂಡ ದೇವೇಂದ್ರನ
ಶಾಪಕೀಡಾದ ಅಪ್ಸರೆಯರತ್ತರೇ?
ಚಂದ್ರಲೋಕದ ಕಾಣದಾ ಜೀವರಾಶಿಗಳು
ಕೂಪಗಳ ಮಡಿಲಿಂದ ಹರಿಬಿಟ್ಟರೇ ?

ಗುಡುಗಿನಬ್ಬರ ಕೇಳಿದಾಗೊಮ್ಮೆ ಅನಿಸುತಿದೆ
ಗಡಬಡಿಸಿ ಮೇಲ್ಯಾರೋ ಓಡಿದಂತೆ !
ಬಡಗುದಿಕ್ಕಲಿ ಸೆಳೆ ಮಿಂಚೊಮ್ಮೆ ಮಿಂಚಿರಲು
ಬೆಳಗೋ ಬೈಗೋ ಸಮಯ ಅರಿಯದಂತೆ !

ಭುವಿಯ ಲಿಂಗವಮಾಡಿ ಆಗಸದ ಪಾತ್ರೆಯಿಂ
ಅಭಿಷೇಚಿಸಿದ ದೇವತೆಗಳದಾರು ?
ಭವದ ಜಗಗುಡಿಯಲ್ಲಿ ಭಕ್ತಿಯರ್ಪಿಸಬಂದ
ಮಹಶೇಷ ರೊಪಿಗಳೇ ಅವರಿದ್ದಾರು !

ಯಾವ ಕೆಲಸಕೊ ತೃಪ್ತಿಗೊಂಡಿರುವ ದೇವತೆಗಳ್
ಭಾವಪೂರಿತವಾಗಿ ಭಾಷ್ಪವಿಳಿಸಿದರೇ ?
ಹಾವಭಾವಗಳನ್ನು ತೋರ್ಗೊಡಿಸಲೀಜಗಕೆ
ಜಾವದಲೇ ದನಿಮಾಡಿ ಮಿಂಚುತಿಹರೇ ?

15 comments:

  1. ಭಟ್ ಜೀ,
    ನಿಮ್ಮ ಕಾವ್ಯ ಸೃಷ್ಟಿ ವರ್ಷಧಾರೆಯ೦ತೆಯೇ ಭೋರ್ಗರೆಯುತ್ತಾ ಸುರಿದಿದೆ. ಬಳಕೆಯಾದ ಉಪಮೆಗಳು ಚೆನ್ನಾಗಿವೆ. ನಾನು ಕೂಡ ಮಳೆಯ ಬಗೆಯಲ್ಲಿಯೇ ಒ೦ದು ಕವನ ಬರೆಯುವವನಿದ್ದೆ. ಒ೦ದಷ್ಟು ಬರೆದೆ, ಆಷ್ಟರಲ್ಲಿ ಬೇರೇನೋ ಕೆಲಸದ ಒತ್ತಡದಿ೦ದ ಹೊರ ಹೋಗಬೇಕಾಯ್ತು, ಹಾಗಾಗಿ ಅದು ಅಲ್ಲಿಗೆ ನಿ೦ತಿತು. ಅದು ಹೀಗಿದೆ ನೋಡಿ.

    ಹಗಲಲಿ ಬಿಸಿಲ ಧಗೆಗೆ ಕಿತ್ತು ಬರುವ ನೊಸಲಧಾರೆ
    ಸಂಜೆ ಮುಗಿಲು ಹರಿದು ಸುರಿವ ಮುಸಲಧಾರೆ
    ರಸ್ತೆ,ಚರ೦ಡಿ ತಗ್ಗು ಜಾಗಗಳೆಲ್ಲ ಜಲಾವೃತ
    ದೃಶ್ಯ-ಶ್ರವ್ಯ ಮಾಧ್ಯಮಗಳಲಿ ಮಳೆಯದೇ ಕಥಾಮೃತ

    ReplyDelete
  2. ಭಟ್ರೆ ತುಂಬ ಸೊಗಸಾದ ಉಪಮೆಗಳ ಆದರೆ ಉಪಮಾತೀತ ಕವಿತೆ
    ನಾ ಮನೆಗೆ ಬಂದಮೇಲೆ (ನಿನ್ನೆ) ಮಳೆ ಜೋರಾಯಿತು ಟಿವಿ ಯಲ್ಲಿ ನೋಡುತ್ತಿದ್ದೆ ಅದೇಕೋ ಮಳೆರಾಯ ಮುನಿದಿದ್ದ

    ReplyDelete
  3. ಬಹಳ ಮುತವರ್ಜಿಯಿಂದ ಹೆಣೆದ ಕವನ ಭಟ್ಟರೇ. ರಾತ್ರಿ ಬೆಂಗಳೂರು ಕಂಡ ಮಳೆ ಅತೀ ಘೋರ. ನಿನ್ನೆ ರಾತ್ರಿ ನನಗೂ ಕಾರು ಗುದ್ದಿ ಚಿಕ್ಕ ಆಕ್ಸಿಡೆಂಟ್ ಆಯಿತು.

    ReplyDelete
  4. ಕನ್ನಡ ಕವನದ ಎಲ್ಲ ರೂಪಗಳಲ್ಲೂ ಎಷ್ಟು ಚೆನ್ನಾಗಿ ಬರೆಯುತ್ತೀರಿ, ಭಟ್ಟರೆ! ಇದು ನಿಜವಾಗಿಯೂ ಕಾವ್ಯಧಾರೆ.

    ReplyDelete
  5. ಗುರುಗಳೆ,
    ನಿಮ್ಮ ಕಾವ್ಯದ ವರ್ಷಧಾರೆಯ ಸೋನೆಮಳೆಯಲ್ಲಿ
    ನೆನೆಯುವುದೇ ಒಂದು ಸೊಬಗು
    ಬೇರೆ ಇನ್ನೆನು ಬೇಕು ಸುಖ ಸಂತೋಷ
    ನೆಮ್ಮದಿಯ ಬಿನ್ನಾಣ ಬೆಡಗು?

    ಹೇಳಲು ಪದಗಳೇ ಇಲ್ಲ. ಸೂಪರ್........

    ReplyDelete
  6. ಶ್ರೀ ಪರಾಂಜಪೆ, ತಾವು ಬರೆದ ಹಾಡಿನ ಭಾಗ ಕೂಡ ಬಹಳ ಹಿಡಿಸಿತು.ಪ್ರತಿಕ್ರಿಯಿಸಿದ ಎಲ್ಲಾ ಮಿತ್ರರಿಗೂ ಅಭಿನಂದನೆಗಳು ಮತ್ತು ಅಭಿವಂದನೆಗಳು

    ReplyDelete
  7. Welcome to Sunil, thanks for following.

    ReplyDelete
  8. ,ಮಳೆಯನ್ನೂ ಹೀಗೂ ವರ್ಣನೆ ಮಾಡಬಹುದೇ..
    ಬರಿದ್ರ ಬರೀಬೇಕು ನಿಮ್ಹಾಂಗ..
    ನಿಮ್ಮನ್ನು ಹೊಗಳಲು ನನಗೆ ಶಬ್ಧದಾರಿದ್ರ್ಯ ಇದೆ..

    ReplyDelete
  9. Thanks, hogala bedi Guruprasad !

    ReplyDelete
  10. ಅದ್ಭುತ ವಿನೂತನ ಹೋಲಿಕೆ ಮತ್ತು ಕಲ್ಪನೆ. ಜೈ ಹೋ!

    ReplyDelete