ಆತ್ಮೀಯ ಬಂಧು, ನಮಸ್ಕಾರ, ವಿ.ಆರ್.ಭಟ್ ತಮಗೆ ಹೃತ್ಪೂರ್ವಕ ಸ್ವಾಗತವನ್ನು ಕೋರುತ್ತಿದ್ದೇನೆ

Monday, August 30, 2010

ಹಸಿರ ಅರಮನೆ


ಹಸಿರ ಅರಮನೆ

ಹಸಿರು ಕಾನನದ ನಡುವಿರುವ ಹಳೆ ಮನೆಯಲ್ಲಿ
ನಸುಬೆಳಕಿನಲಿ ಕುಳಿತು ಚಹ ಕುಡಿವ ಮನಕೆ
ಪಿಸುಮಾತನರಗಿಣಿಯು ಪಂಜರದಿ ಕೂಗಿರಲು
ಹೊಸ ಆಸೆ ಗರಿಗೆದರಿ ಹಾರತೊಡಗಿದೆನು

ಅಲ್ಲಿ ಜಂಜಡವಿಲ್ಲ ಜಡಹಿಡಿದ ಬದುಕಲ್ಲ
ನಲ್ಲಿ ನೀರಿಗೆ ಕಾಯ್ವ ನ್ಯೂನತೆಯು ಇಲ್ಲ
ಬಲ್ಲವರು ಬಹಳಿಹರು ಬದುಕ ತೋರಿಸುವುದಕೆ
ಸಲ್ಲದಾಮಿಷಗಳಾ ಗೊಡವೆ ಬಹದಲ್ಲ

ನೀರವದ ಇಳೆಯಲ್ಲಿ ಜುಳುಜುಳು ನಿನಾದಿಸುತ
ಆರೂರ ಸುತ್ತರಿವ ಬೆಳ್ನೊರೆಯ ತೊರೆಗಳ್
ಮೇರೆ ಮೀರಿದ ಸುಖದ ನೋಂಪಿಯದ ಭುಂಜಿಸಲು
ನೂರೆಂಟು ಸಂಗ್ತಿಗಳು ಕಣ್ಣ ತುಂಬುವವು

ಒತ್ತಡದ ದಿನವಿಲ್ಲ ಹತ್ತಿರದ ಒಡನಾಟ
ನೆತ್ತಿಯಲೆ ತುಂಬಿ ತೊನೆಯುವ ಹಣ್ಣು ಗಿಡಗಳ್
ಮತ್ತೆ ನೇಸರನ ಕಿರು ಕಿರು ನೋಟ ಕೆಲದಿನದಿ
ಒತ್ತಟ್ಟಿಗಿರುವರಲಿ ಹಬ್ಬದಾಚರಣೆ

ವಿದ್ಯುತ್ತು ಬೇಡೆಮಗೆ ನಾವೇ ತಯಾರಿಪೆವು
ಗದ್ಯ-ಪದ್ಯವನೋದೆ ಸಮಯ ಬಹಳಿಹುದು
ವಿದ್ಯೆಗಳ ಆಗರವು ಬದುಕನಾಲಂಗಿಸುತ
ಸಾದ್ಯಂತ ಸಂಸ್ಕೃತಿಯ ತವರು ನಮದಿಹುದು

ಬೆಳಗು ಬೈಗಿನ ವೇಳೆ ನಿತ್ಯವೂ ನಮಿಸುತ್ತ
ಉಳುಮೆಮಾಡುತ ಭೂಮಿ ಫಲವ ಪಡೆಯುವೆವು
ನಳನಳಿಸಿ ಬೆಳೆದಿರುವ ಹೂ ಗಿಡಗಳಂದದಲಿ
ಒಳಗೊಳಗೆ ಸಂತಸವು ತುಂಬಿ ಹರಿದಿಹುದು

16 comments:

  1. ಹಸಿರ ಅರಮನೆಯ ನವಿರಾದ ವರ್ಣನೆ..ಪಿಸುಮಾತನರಗಿಣಿಯು ಪಂಜರದಿ ಕೂಗಿರಲು
    ಹೊಸ ಆಸೆ ಗರಿಗೆದರಿ ಹಾರತೊಡಗಿದೆನು..ಅಧ್ಭುತ ಕಲ್ಪನೆ..ಭಟ್ ಸರ್.

    ಅನ೦ತ್

    ReplyDelete
  2. ಚಂದದ ಚಿತ್ರಕೊಂದು ಅಂದದ ಕವಿತೆಯ ಶೃಂಗಾರ.ಇನ್ನು ಕವಿತೆಗೋ ಸುಂದರ ಪದಗಳ ಅಲಂಕಾರ ಓದುವ ಮನಸ್ಸಿಗೆ ಹಾಗು ನೋಡುವ ಕಣ್ಣುಗಳಿಗೆ ಸಂತಸ ಸಂಭ್ರಮದ ಸುಂದರ ಹಾರ.

    ReplyDelete
  3. ಆದಿಪ್ರಾಸದ ಕವನ ಅದ್ಭುತವಾಗಿ ಮೂಡಿ ಬಂದಿದೆ ವಿ. ಆರ್. ಭಟ್ ಸರ್..

    ReplyDelete
  4. ಚೆ೦ದದ ಪರಿಸರದ(ಹಸಿರ ಅರಮನೆ) ಮೇಲಿನ ಕವನ.

    ReplyDelete
  5. ಹಸಿರು ಕಾನನದ ನಡುವೆ ಸುಂದರ ಹಸಿರು ಅರಮನೆಯ ದೃಶ್ಯ... ಮನಸೆಳೆಯುವ ಪದ ಪುಂಜಗಳ ವಿವರಣೆ... ಭಟ್ ಸಾರ್ ತುಂಬಾ ಚೆನ್ನಾಗಿದೆ... ಖುಷಿಯಾಯ್ತು ಓದಿ.... ನಾ ಕಲ್ಪನಾ ಲೋಕಕ್ಕೂ ಹೋಗಿ ಬಂದೆ... ಆ ಹಸಿರರಮನೆಯಲ್ಲಿ ಕುಳಿತು ಶುಭ್ರ ಮುಂಜಾನೆಯಲ್ಲಿ ಚಹಾ ಹೀರಲು.... ಅದ್ಭುತ ಸಾರ್....

    ಶ್ಯಾಮಲ

    ReplyDelete
  6. ಭಟ್ ಸರ್;ಆದಿ ಪ್ರಾಸದ ಅದ್ಭುತ ಕವನ.ನೀವು ಅಷ್ಟಾವಧಾನ ಶುರು ಮಾಡಬಹುದು.

    ReplyDelete
  7. ಹಸಿರ ಅರಮನೆಯ ಕಾವ್ಯಮಯ ವರ್ಣನೆ ಬಹು ಚೆನ್ನಾಗಿದೆ.

    ReplyDelete
  8. ಭಟ್ ಸರ್‍, ಹಸಿರ ಕಾಡಿನ ನಡುವಿನ ಅರಮನೆಯ ಕಲ್ಪನಾಲೋಕದಲ್ಲಿ ವಿಹರಿಸುವಂತೆ ಮಾಡಿದ ಕಾವ್ಯ ಚೆನ್ನಾಗಿದೆ.

    ಸ್ನೇಹದಿಂದ,

    ReplyDelete
  9. ಪ್ರಕೃತಿಯ ಮಡಿಲಲ್ಲಿ ಬದುಕುವ ಕನಸು ಸೊಗಸಾಗಿದೆ. ಇದು ಸಾಧ್ಯವಾಗಬಹುದೆ?

    ReplyDelete
  10. ಚೆನ್ನಾಗಿದೆ...
    (ನಾನೂ ಆಗೊಮ್ಮೆ ಹೀಗೊಮ್ಮೆ ಬ್ಲಾಗ್ ಕಡೆ ಬಂದರೂ ನಿಮ್ಮ ಎಲ್ಲ ಬರಹಗಳನ್ನು ಓದಿ ಕಾಮೆಂಟ್ ನೀಡಿರುತ್ತೇನೆ..)

    ReplyDelete
  11. ನೆಟ್ ಪ್ರಾಬ್ಲೆಮ್ ಇರುವ ಕಾರಣ ಒಂದೇ ಉತ್ತರದಲ್ಲಿ ಮುಗಿಸುತ್ತಿದ್ದೇನೆ, ನಿಮ್ಮೆಲ್ಲರ ಪ್ರತಿಕ್ರಿಯೆಗಳೂ ಬಹಳ ಮುದ ನೀಡಿವೆ, ಎಲ್ಲರಿಗೂ ಅನಂತ ಧನ್ಯವಾದಗಳು

    ReplyDelete
  12. ಭಟ್ ಸರ್,

    ಸುಂದರ ಮನೆಯ ವಾತಾವರಣಕ್ಕೆ ತಕ್ಕಂತೆ ಸೊಗಸಾದ ಕವನವನ್ನು ಬರೆದಿದ್ದೀರಿ..

    ReplyDelete
  13. Bhatre,

    enu helbeku anta gottagta illa....erade shabdhadalli helbeku andre Simplyyyyy Superbbbbb Sir...

    ReplyDelete