ಆತ್ಮೀಯ ಬಂಧು, ನಮಸ್ಕಾರ, ವಿ.ಆರ್.ಭಟ್ ತಮಗೆ ಹೃತ್ಪೂರ್ವಕ ಸ್ವಾಗತವನ್ನು ಕೋರುತ್ತಿದ್ದೇನೆ

Monday, March 1, 2010

ನಿಮ್ಮ ಮುಖದಲಿ ನಗುವದರಳಿದರೆ ಸಾಕೆನಗೆ


[ಚಿತ್ರಗಳ ಋಣ : ಅಂತರ್ಜಾಲ ]

ಮನುಷ್ಯ ಸ್ವಾರ್ಥರಹಿತನಾಗಿ ವಿಶ್ವವೇ ತನ್ನ ಕುಟುಂಬ ಎಂಬರೀತಿಯಲ್ಲಿ ನಡೆದುಕೊಂಡರೆ ಆಗ ಅದರ ಅನುಭವವೇ ಬೇರೆ! ನಾವು ಬಾಯಲ್ಲಿ ಹೇಳಿಬಿಡುತ್ತೇವೆ-ನಾವು ಹಾಗೇ ಇದ್ದೇವೆ ಎಂದು, ಇಲ್ಲ ನೀವೇ ವಿಚಾರಿಸಿಕೊಳ್ಳಿ ನಿಮ್ಮ ಮನಸ್ಸನ್ನು, ಇಂದು ಹಣ್ಣಿನ ಅಂಗಡಿಯಲ್ಲಿ ಹೊಸಥರದ ಹಣ್ಣುಬಂದರೆ ಸ್ಥಿತಿವಂತರಾದನಾವು ಒಮ್ಮೆಲೇ " ಏ ಎಲ್ಲಾ ನಮಗೇ ಇರ್ಲಪ್ಪಾ , ಕವರಲ್ಲಿ ಹಾಕಿ ಪ್ಯಾಕ್ ಮಾಡಿಬಿಡು " -ಎನ್ನುತ್ತೇವೆ, ಇದನ್ನು ಮನುಷ್ಯ ಸಹಜ ಬಯಕೆ ಎನ್ನುತ್ತೇವೆ, ನಮ್ಮ ಥರದಲ್ಲೇ ಹಲವರು ಪಕ್ಕದಲ್ಲಿ ನಿಂತಿರುವವರು ಅಂತಹ ಹಣ್ಣನ್ನು ಬಯಸಿರಬಹುದು, ಅವರಿಗೂ ಬೇಕೆನಿಸಿರಬಹುದು ಆದರೆ ಆ ಗ್ರಹಿಕೆ ನಮಗಿಲ್ಲ. ಮನೆಯಲ್ಲಿ ಸಿಹಿತಿಂಡಿ ಮಾಡಿದಾಗ ಎಲ್ಲವೂ ನನಗಿರಲಿ ಅಥವಾ ಜಾಸ್ತಿ ನನಗಿರಲಿ- ಇದು ನಮ್ಮ ಹಪಹಪಿಕೆ, ಇದು ಜಿವ್ಹಾಚಾಪಲ್ಯ. ಇಂತಹ ತಾನು-ತನ್ನದು-ತನಗಿರಲಿ-ತನ್ನ ಕುಟುಂಬಕ್ಕೆ ಮಾತ್ರವಿರಲಿ ಎಂಬ ಬಯಕೆಯನ್ನ ಈ ಸಣ್ಣತನವನ್ನ ತೋರೆಯುವುದೇ ' ಪ್ರತ್ಯಾಹಾರ ' . ನಮ್ಮ ಪೂರ್ವಜರು, ಸಾಧಕರು,ಋಷಿಮುನಿಗಳು ತಮ್ಮನ್ನೇ ವಿಶ್ವಕ್ಕೆ ಸಮರ್ಪಿಸಿಕೊಂಡು ತನ್ಮೂಲಕ ಕಂಡ ಅಷ್ಟಾಂಗಯೋಗದ ಒಂದು ಹಂತ. ಯೋಗವೆಂದರೆ ಯೋಗಾಸನಮಾತ್ರವಲ್ಲ, ಅದು ಮನಸ್ಸನ್ನ ಪಕ್ವವಾಗಿಸುವ ಎಂಟು ಹಂತದ ಪ್ರಕ್ರಿಯೆ; ಅದು ಎಲ್ಲರಿಂದಲೂ ಸಾಧ್ಯವಿಲ್ಲ.ಆದರೂ ನಮ್ಮೊಳಗಿನ ಕೆಲವು ಅನವಶ್ಯಕ -ಅತಿರೇಕದ ಕೊಳ್ಳುಬಾಕತನವನ್ನು, ಬಯಕೆಗಳನ್ನು-ಕಾಮೆನೆಗಳನ್ನು ಜಯಿಸೋಣ-ಅದೇ ನಿಜವಾದ ಕಾಮದಹನ !

ಯಮ,ನಿಯಮ, ಆಸನ, ಪ್ರಾಣಾಯಾಮ, ಪ್ರತ್ಯಾಹಾರ, ಧಾರಣ, ಧ್ಯಾನ, ಸಮಾಧಿ ಎಂಬ ಎಂಟು ಹಂತಗಳಿಂದ ದೇಹ-ಮನಸ್ಸಿನ ಶುದ್ಧೀಕರಣ ಕ್ರಿಯೆ ನಡೆಸಲ್ಪಡುತ್ತದೆ. ಹೇಗೆ ನಾವು ಕುಡಿಯುವ ನೀರನ್ನು ಶೋಧಿಸಿ,ಸೋಸಿ ಶುದ್ಧವಾಗಿಸುತ್ತೆವೋ ಹಾಗೇ ನಮ್ಮ ಜನ್ಮಜಾತ ಮೇಳೈಸಿದ ನಮ್ಮ ಕರ್ಮದ-ಅದರ ಫಲದ ಬಾಧ್ಯತೆಗಳನ್ನು ತೊಡೆದುಹಾಕಲು ಈ ಅಷ್ಟಾಂಗಯೋಗವೆಂಬ ಪ್ರಕ್ರಿಯೆ ಬಹಳ ಪ್ರಸ್ತುತ ಮತ್ತು ಅತೀ ಉತ್ತಮ ಮಾರ್ಗ ಕೂಡ, ಇದನ್ನು ಅನುಸರಿಸುತ್ತ ಹಲವಾರು ರೋಗ-ರುಜಿನಗಳನ್ನು ನಾವು ಕಳೆದುಕೊಂಡು ಶುದ್ಧರಾಗುತ್ತೇವೆ; ಅಷ್ಟೇ ಏಕೆ ಸರಿಯಾಗಿ ಅನುಸರಿಸಿದರೆ ರೋಗಗಳು ಹತ್ತಿರ ಸುಳಿಯುವುದೇ ಇಲ್ಲ. ಆದರೆ ಇದು ಕಟ್ಟುನಿಟ್ಟಿನ ಕಷ್ಟ ಮಾರ್ಗ, ಇದನ್ನು ಸಂಪೂರ್ಣವಾಗಿ ಅನುಸರಿಸಲು ಜನಸಾಮಾನ್ಯನಿಂದ ಸ್ವಲ್ಪ ಕಷ್ಟಸಾಧ್ಯ, ಹೀಗಾಗಿ ಅವು ಸಾರುವ ತತ್ವಗಳನ್ನಾದರೂ ಅನುಸರಿಸೋಣ.

ಎಲ್ಲಿ ವಿಶ್ವಬ್ರಾತೃತ್ವ ಇರುತ್ತದೋ ಅಲ್ಲಿ ಮೇಲು-ಕೀಳೆಂಬ ಭೇದ ಇರುವುದಿಲ್ಲ, ಹೊಂದಾಣಿಕೆಯೇ ಜೀವನದ ಸೂತ್ರವಾಗಿರುತ್ತದೆ. ನಮ್ಮಲ್ಲಿ ದೊಡ್ಡತನ ಒಡಮೂಡಿದಾಗ ಅಲ್ಲಿ ಜಗಳಕ್ಕೆ ಆಸ್ಪದವಿರುವುದಿಲ್ಲ. ಇದಕ್ಕೆ ಒಂದು ಸಣ್ಣ ಉದಾಹರಣೆ ಕಾಗೆ, ಒಂದು ಕಾಗೆ ಎಲ್ಲಾದರೂ ಏನನ್ನಾದರೂ ತಿನ್ನುವ ವಸ್ತುವನ್ನು ಕಂಡರೆ ಅದು ತನ್ನ ಬಳಗವನ್ನೆಲ್ಲಾ ಕೂಗಿ ಕರೆದು, ಅವುಗಳೆಲ್ಲ ಬಂದಮೇಲೆ ಒಟ್ಟಾಗಿ ಸ್ವೀಕರಿಸುತ್ತವೆ. ಹೀಗೇ ನಮಗೆ ಮಾತ್ರ ಇರಲಿ, ನನ್ನದು, ನನ್ನ ಮನೆ-ನನ್ನ ಕಾರು, ನನ್ನ ತೋಟ --ಈ 'ನಾನು' ಮತ್ತು 'ನನ್ನದು' ಪರಿಧಿಯನ್ನು ಮಾನಸಿಕವಾಗಿ ಸ್ವಲ್ಪ ಆಚೆ ಇಟ್ಟಾಗ ಸಿಗುವ ಆನಂದವೇ ಬೇರೆ. ಅಲ್ಲಿ ಸ್ವಾರ್ಥವಿರುವುದಿಲ್ಲ, ಎಲ್ಲರಮೇಲೆ ಪ್ರೇಮವಿರುತ್ತದೆ, ಪ್ರೀತಿಯಿರುತ್ತದೆ, ಇಂತಹ ಪ್ರೇಮ ನಮ್ಮೆಲ್ಲರಲ್ಲಿ ಪರಸ್ಪರ ಬೆಸುಗೆಯನ್ನು ಹಾಕುತ್ತದೆ, ಯಾರೂ ಕಚ್ಚಾಡಲಾರೆವು, ಯಾರೂ ಯಾರನ್ನೂ ದೂರಮಾಡಲಾರೆವು ಎಂಬ ಭಾವನೆ ಹೊರ ಹೊಮ್ಮುತ್ತದೆ. ಇರವುದನ್ನು ಹಂಚಿತಿನ್ನುವ ಪ್ರವೃತ್ತಿ ಬೆಳೆಯುತ್ತದೆ. ಬೇರೆಯವರ ಕಷ್ಟ-ಸುಖಕ್ಕಾಗುವ ಮನೋಭಾವ ಬರುತ್ತದೆ, ಎಲ್ಲರ ಮುಖದಲ್ಲಿ ನಗು ಸದಾ ಇರಲಿ ಎಂಬ ಅನಿಸಿಕೆ ನಮ್ಮೊಳಗೇ ಗುನು ಗುನಿಸುತ್ತಿರುತ್ತದೆ, ಇದು ಎಲ್ಲರಲ್ಲಿರಲಿ ಎಂಬುದೇ 'ನನ್ನದಲ್ಲದ' ನನ್ನ ಈ ಕವನದ ಆಶಯ. ಹೋಳಿಯ ಬಣ್ಣ- ಸಂತೋಷ -ಸಂಭ್ರಮ ಸದಾ ನಮ್ಮ ಜೀವನತುಂಬಾ ತುಂಬಿರಲಿ ಎಂಬ ಹಾರೈಕೆಯೊಂದಿಗೆ --


ನಿಮ್ಮ ಮುಖದಲಿ ನಗುವದರಳಿದರೆ ಸಾಕೆನಗೆ


ನಿಮ್ಮ ಮುಖದಲಿ ನಗುವದರಳಿದರೆ ಸಾಕೆನಗೆ
ನನ್ನ ನೋವನು ಮರೆವೆ ಅದರ ಒಳಗೆ
ಭಿನ್ನವೆಲ್ಲಿಹುದು ವಸುದೈವ ಕುಟುಂಬವು ನಮದು
'ನನ್ನ' ಕಳೆದೆನು ಬರುತ ಹೊರಗೆ ಇಳೆಗೆ

ಹಲವನ್ನು ಎಣಿಸಿದಿರಿ ಕೆಲವನ್ನು ಗುಣಿಸದಿರಿ
ಹೊಲಮನೆಯ ಜೀವನದಿ ತತ್ವವಿಹುದು
ಒಲವು ತಾನಾಗಿ ಹರಿದಿರೆ ವಿಶ್ವ ತುಂಬೆಲ್ಲ
ಗೆಲುವ ಸಾರುತ ಬರುವ ದೈವವಿಹುದು

ಹಿಂಸಿಪುದು ಬೇಡೆಮಗೆ ಅದುತರುವ ದುಃಖ ಬೇಡ
ಕಂಸರಾಜನ ಕಥೆಯ ಮರುಕಳಿಕೆ ಬೇಡ
ಹಂಸಕ್ಷೀರದ ನ್ಯಾಯ ಜಾಣ್ಮೆ ಮೇಳೈಸಿರಲಿ
ಪುಂಸವನದಲೇ ಬರಲಿ ನಮಗೆ ತಿಳುವಳಿಕೆ

ಇಲ್ಲಿ ವೈರಿಗಳಿಲ್ಲ ಇಲ್ಲಿ ದೊಂಬಿಗಳಿಲ್ಲ
ಬಲ್ಲಜನರನು ಕೇಳಿ ಎಲ್ಲಾ ಹತ್ತಿರವು
ಮಲ್ಲಿನಾಥನ ಮುಡಿಗೆ ಮಲ್ಲಿಗೆಯ ಹೂ ತರಲು
ಎಲ್ಲ ಕೆಲಸದಿ ನಾವು ತೊಡಗಿಕೊಂಡಿಹೆವು

ಮೇಲುಕೀಳೆಂಬ ಭಾವವ ಮಾರು ದೂರಿಡುತ
ಸಾಲು ದೀಪವ ಹಚ್ಚಿ ಮನದಿ ಮುದದಿ
ಕಾಲ ಕಾಲಕು ನಮ್ಮ ನಾವ್ ತಿದ್ದಿ ಮುನ್ನಡೆದು
ನಾಲೆ ತುಂಬಲಿ ಜ್ಞಾನನೀರ ಹರಿವಿನಲಿ

ಅಣ್ಣತಮ್ಮರು ಅಕ್ಕ ತಂಗಿಯರು ನಾವಾಗೆ
ಬಣ್ಣಿಸಲು ಬಹಳ ಖುಷಿ ನಮ್ಮ ಸಂಪದವ
ಕಣ್ಣನೀರನು ಒರೆಸೆ ನಮಗಿಹುದು ಕೈ ಹಲವು
ಬಣ್ಣ ಹಚ್ಚುವ ಬನ್ನಿ ಬದುಕು ತುಂಬಾ

7 comments:

  1. ಸ್ವಾರ್ಥ ರಹಿತ,ಜಗಳವಿಲ್ಲದ,ದ್ವೇಷವಿಲ್ಲದ,ಸದಾ ಪ್ರೀತಿ,ಪ್ರೇಮ,ಸಹನೆ ತು೦ಬಿದ ಸಕಾರತ್ಮಕ ಧೋರಣೆಯ,ಇದ್ದುದರಲ್ಲೇ,ಪಡೆದುದರಲ್ಲೇ,ತೃಪ್ತಿ ಪಡುವ ಆ ಆನ೦ದ ಅನುಭವಿಸಿದವರಿಗೇ ಗೊತ್ತು.ಇದು ಸರ್ವತ್ರ ಪಸರಿಸುವ೦ತಾಗಲಿ ,ಸ್ವಸ್ಥ್ಸ ಸಮಾಜ ನಿರ್ಮಾಣವಾಗಲಿ ಎ೦ಬುದೇ ನನ್ನ ಆಶಯ.
    ತು೦ಬಾ ತು೦ಬಾ ಸು೦ದರವಾಗಿದೆ ನಿಮ್ಮ ಕವನ ಮತ್ತು ಆಶಯ.

    ReplyDelete
  2. ವಿಶ್ವಕುಟು೦ಬ ಸಾರದ ತಮ್ಮಗೀತೆ ಹಾಗೂ ಪೂರಕ ಲೇಖನ ಚೆನ್ನಾಗಿದೆ.

    ReplyDelete
  3. ಎಲ್ಲರೂ ನಮ್ಮ ಕುಟುಂಬದವರೇ ಆದಾಗ ಜಗಳ ಇದ್ದರೂ ಮನೆಜನರಲ್ಲಿ ಜಗಳದಲ್ಲಿ ಆಗುವ ಥರ ಹೊಂದಾಣಿಕೆ ಸಾಧ್ಯ ಎಂಬುದು ನನ್ನ ಭಾವನೆ, ಸದ್ಯ ಪ್ರತಿಕ್ರಿಯಿಸಿದ ಕು.ಸು.ಮುಳಿಯಾಲ ಮತ್ತು ಸೀತಾರಾಮ್ ಈರ್ವರಿಗೂ ವಂದನೆಗಳು, ಮುಂದೆ ಓದಲಿರುವ ಎಲ್ಲ ಸಹಕುಟುಂಬಿಗಳಿಗೂನಮನಗಳು

    ReplyDelete
  4. "ವ್ಯಕ್ತಿಯೊಬ್ಬನ ನಗುವನ್ನು ನೋಡುವುದು ಚಂದ .ಆ ನಗುವಿಗೆ ನೀವೇ ಕಾರಣರಾದರೆ ಅದನ್ನು ನೋಡಲು ಇನ್ನೂ ಚಂದ".ಅನ್ನುವ ಹಾಗೇ ನಿಮ್ಮ ಲೇಖನ ಮತ್ತು ಕವನ ಓದಿ ನಂಗೆ ನನಗೆ ಹಾಗೇ ಅನಿಸಿತು.
    ಕಾಗೆಗೂ ಮನುಷ್ಯನಿಗೆ ಎಷ್ಟು ವ್ಯತ್ಯಾಸ ಉಂಟು ಆಲ್ವಾ .ಮಾನವ ತಾನು ,ತನ್ನದು ಎನ್ನುವುದು ಬಿಟ್ಟರೇ ತಾನೇ ?????

    ReplyDelete
  5. ಧನ್ಯವಾದಗಳು ಶಶಿ, ಎಲ್ಲರೂ ಪರಸ್ಪರ ಹಾಗಿದ್ದರೆ ಜಗತ್ತು ಹೇಗಿರುತ್ತಿತ್ತಲ್ಲವೇ?

    ReplyDelete
  6. ನಿಮ್ಮ ಸರಳವಾದ ಶೈಲಿ ಮೆಚ್ಚುಗೆಯಾಯ್ತು.
    ನನ್ನ ಒಂದು ಕವನವನ್ನು ಇಲ್ಲಿ ಕೇಳಿ...
    http://www.binfire.com/rel/?page=hotlink&id=145957:0:0

    ಬಿನ್ ಫೈರ್ ಡಾಟ್ ಕಾಮ್ ನಲ್ಲಿ ನನ್ನ ಹಲವು ಕವನಗಳಿವೆ. ಹಲವು ಉಪಯುಕ್ತ ಉಪನ್ಯಾಸಗಳೂ ಇವೆ. ತೆರೆಯುವುದರಲ್ಲಿ ತಾಂತ್ರಿಕ ತೊಂದರೆ ಎದುರಾಗಬಹುದು. ಅದನ್ನೆಲ್ಲಾ ಸರಿಪಡಿಸಿಕೊಳ್ಳಬೇಕಾಗಿದೆ.
    ನಿಮ್ಮ ಬ್ಲಾಗ್ ನೋಡುತ್ತಾ ಕುಳಿತರೆ ಸಮಯ ಹೋಗುವುದೇ ತಿಳಯುವುದಿಲ್ಲ. ನಿಧಾನವಾಗಿಯಾದರೂ ಎಲ್ಲಾ ನೋಡಬೇಕೆಂಬ ಆಸೆ ಇದೆ.

    ReplyDelete
  7. ಕನ್ನಡದಲ್ಲಿ ನವ್ಯಕಾವ್ಯಗಳಿಂದ ಕನ್ನಡತನ ಮರೆಯಾಗುತ್ತಿದೆ, ಇದಕ್ಕಾಗಿ ಅತೀವ ಶ್ರದ್ಧಾ-ಭಕ್ತಿಯಿಂದ ದಿನಂಪ್ರತಿ ಕನ್ನಡಕ್ಕೆ ನನ್ನ ಕೆಲವು ಸಮಯ ಕಳೆಯುತ್ತಿದ್ದೇನೆ, ಅನೇಕರು ನನ್ನ ಬೆಳಗಿನ ಮೇಲ್ [ಸಂದೇಶ] ಬರಲಿ ಎಂದು ಕಾಯುತ್ತಾರಂತೆ! ಇದು ಒಂಥರಾ ಹಾಲು-ಪೇಪರ್ ಹಾಕುವವರ ರೀತಿ ಆಗಿದೆ ಅಂತ ನಾನಂದುಕೊಂಡಿದ್ದೇನೆ, ನನ್ನ ಮಾತು-ನಡೆ-ನುಡಿಗಳಲ್ಲಿ ದರ್ಪ್-ದೌರ್ಬಲ್ಯ ಕಂಡುಬಂದರೆ ದಯವಿಟ್ಟು ಕ್ಷಮಿಸಿ, ಎಷ್ಟೆಂದರೂ ನಾನೊಬ್ಬ ಮನುಷ್ಯನೇ ಅಲ್ಲವೇ ?

    ನಿಮ್ಮ ಅಭಿಮಾನದ ಒಕ್ಕಣಿಕೆಗೆ ತುಂಬಾ ಆಭಾರಿ.

    ReplyDelete