ಆತ್ಮೀಯ ಬಂಧು, ನಮಸ್ಕಾರ, ವಿ.ಆರ್.ಭಟ್ ತಮಗೆ ಹೃತ್ಪೂರ್ವಕ ಸ್ವಾಗತವನ್ನು ಕೋರುತ್ತಿದ್ದೇನೆ

Monday, March 15, 2010

ವಸಂತೋತ್ಸವ

ಯುಗಾದಿಯ ಬಗೆಗೆ ಹೊರಟರೆ ಅದು ಬರೆಯುವ ಅಧ್ಯಾಯ ಬಹಳ ಅಗಾಧ,ಹೊಸ ವರ್ಷವನ್ನು ತನ್ನ ರಂಗೋಲಿಯೊಂದಿಗೆ ಆರಂಭಿಸುವ ಈ ಯುಗಾದಿ ಜೀವನದಲ್ಲಿ ಹೊಸತನವನ್ನು ನೀಡುವ ಹರಿಕಾರ! ಬಳಲಿ ಬೆಂಡಾದ ಮನಕ್ಕೆ, ಹಳತನ್ನೇ ನೋಡಿ ಬೇಸತ್ತ ಮನಕ್ಕೆ ಹೊಸದೇನನ್ನೋ ಹೊತ್ತುತರುವ ಈ ಘಳಿಗೆ ಹೊಸದಾಗಿ ಹಸಿರುಡುವ ಗಿಡಮರಗಳಲ್ಲಿ ಬಣ್ಣ ಬಣ್ಣದ ಹೂಗಳನ್ನರಳಿಸಿ, ತರಾವರಿ ಬಣ್ಣದ ಚಿಟ್ಟೆಗಳನ್ನು ಹಾರಿಸಿ, ದೂರಬಾನಲ್ಲಿ ಸ್ವಲ್ಪ ಮೋಡಗಟ್ಟಿ ತುಂತುರು ಮಳೆಯ ಸಿಂಚನಮಾಡಿ-ಮಂತ್ರದಾತೀರ್ಥ ಪ್ರೋಕ್ಷಣೆ ಮಾಡಿ, ಚಿಕ್ಕ ಚೊಕ್ಕ ಕಾಮನಬಿಲ್ಲು ಸೃಜಿಸಿ, ಆಗಸದ ಗಡಿಗೆ ಒಮ್ಮೊಮ್ಮೆ ಬೆಳ್ಳಿಯ ಚಿತ್ತಾರ ಮೂಡಿಸಿ, ಮಾವಿನ ತೋರಣಕಟ್ಟಿ ನಮ್ಮೆಲ್ಲರ ಕಣ್ಮನ ತಣಿಸುವ ಋತು ವಸಂತ ನಿಜಕ್ಕೂ ನಿಸರ್ಗದಚ್ಚರಿ ! ವಿಧ ವಿಧ ಪಶು ಪಕ್ಷಿಗಳು ಅವುಗಳ ಕೂಗು-ಕಲರವ ಬಹುತರ ಹಣ್ಣು-ಕಾಯಿಗಳು ಇದನ್ನೆಲ್ಲ ನೋಡಲು ಎರಡು ಕಣ್ಣಜೊತೆ ಸಾವಿರ ಕಣ್ಣುಗಳ ಮನಸ್ಸು ಬೇಕು. ಮೈಯೆಲ್ಲಾ ಕಣ್ಣಾಗಿ ಆಸ್ವಾದಿಸಿದಾಗ ಅದರ ಸ್ವಾದವೇ ಬೇರೆ. ನಿಸರ್ಗ ನೋಂಪಿಯ ಈ ಶುಭ ಘಳಿಗೆ ವರುಷ ವರುಷವೂ ಬರಲಿ, ಮರಳಿ ಮರಳಿ ಬರಲಿ, ನಮಗೆಲ್ಲ ಹೊಸ ಹೊಸತನು ತರಲಿ, ಬದುಕು ನವ ನಾವೀನ್ಯತೆ ತುಂಬಿ ನಳನಳಿಸಲಿ, ದೀರ್ಘ ಆಯುಷ್ಯ-ಆರೋಗ್ಯ- ಐಶ್ವರ್ಯ-ಜ್ಞಾನ-ಸುಖ-ಸಮೃದ್ಧಿ ದೊರೆಯಲಿ ಎಂಬುದೀ ಕವಿಮನದ ಆಶಯ, ಸದಾಶಯ, ಶುಭಾಶಯ.























[ಚಿತ್ರಗಳ ಋಣ- ಶುಭಾಶಯ.ಕಾಂ ಮತ್ತು ಅಂತರ್ಜಾಲ]




ವಸಂತೋತ್ಸವ



















ಬಂದನಾ ವಸಂತ ರಾಜ ಬಣ್ಣದ ರಥವೇರುತಾ
ಚಂದದಾ ವಿಹಾರ ನಡೆಸಿ ನಮ್ಮನೆಲ್ಲ ನಲಿಸುತಾ


ಹೂ ಗಿಡಗಳು ಅರಳಿನಿಂತು ಮಘಮಘಿಸುತ ಮೈಮನ
ಕೂಗುತಿಹವು ಕೋಗಿಲೆಗಳು ಭುವಿಯದಾಯ್ತು ನಂದನ
ಮಾಗಿನಿಂತ ಹಣ್ಣುಗಳವು ಬಾಗಿಕರೆಯೆ ಕಾಮನಾ
ಯೋಗಬೇಕು ಭೋಗಿಸಲ್ಕೆ ಬೀಗುತಿಹುದು ಜನಮನ


























ಹಸಿರಸೀರೆ
ಉಟ್ಟ ಮರದಿ ಕೆಂಪು ಚಿತ್ರದೌತಣ

ಬಿಸಿಲ ಬೇಗೆ ಕಳೆಯಲದಕೆ ತಂಗಾಳಿಯ ಸೇಚನ
ನಸುನಾಚುವ ಅಳಿಲಮೊಗದಿ ತುಂಟನಗುವ ನರ್ತನ
ರಸಗಳಿಗೆಯ ಕವಿಯು ಹಾಡೆ ಕಬ್ಬವಾಯ್ತು ಕವಿಮನ



ಕೊಸರಿಕೊಂಡು ಹಾರುವಾಗ ಚಿಟ್ಟೆ ಬರೆದ ಪತ್ರವು

ನೊಸಲಿಗಂಟಿದಂಟಿನಾಟ ಅಹಹ ಎಂಥ ಸ್ಪರ್ಶವು
ಒಸಗೆಯದುವೆ ಬದುಕಿನಲ್ಲಿ ಬೀಗತನದ ಹರ್ಷವು
ಪಿಸುಮಾತಿನ ಗಿಳಿಸಾರಿತು ಬರಲಿ ವರ್ಷವರ್ಷವೂ















ಸೇರು
ಪಾವು ಅಳೆದು ತೂಗಿ ಕೊಡಲೆನಗೆ ಅಸಮ್ಮತ

ಸಾರಿ ಹೇಳ್ವೆ ಸಾಗರದೋಪಾದಿಯಲಿರೆ ಸಮ್ಮತ
ಸೇರಿಬನ್ನಿರೆಲ್ಲಕೂಡಿ ಮೆರೆವ ಯುಗದ ಪದಪಥ
ಸೂರೆ ಹೊಡೆಯೆ ಸುರರು ನೆನೆದು ಮತ್ಸರಿಸಲಿ ಸಾಂಪ್ರತ



ಮುಂಚಿತವೇ ಹೇಳ್ವ ನಾವು ಯುಗಾದಿ ಜಗದೋತ್ಸವ
ಕಿಂಚಿತ್ತೂ ಕೊರತೆಯಿಲ್ಲ ಶುಭದ ವಸಂತೋತ್ಸವ
ಸಂಚಿಯಿಂದ ತೆಗೆದು ಹಂಚಿ ಬೇವು-ಬೆಲ್ಲದುತ್ಸವ
ಮಿಂಚಲಿ ನಮ್ಮೆಲ್ಲರ ಬಾಳದು ನವನವೋತ್ಸವ






ಮಧುವಾತಾ ಋತಾಯತೇ ಮಧುಕ್ಷರಂತಿ ಸಿಂಧವಃ |
ಮಾಧ್ವೀರ್ನಃ ಸಂತ್ವೋಷ ಧೀಃ ||
ಮಧುನಕ್ತಮುತೋಷಸಿ ಮಧುಮತ್ಪಾರ್ಥಿವಗ್೦ ರಜಃ |
ಮಧು ದ್ಯೌರಸ್ತು ನಃ ಪಿತಾ ||
ಮಧುಮಾನ್ನೋ ವನಸ್ಪತಿರ್ಮಧುಮಾಗ್೦ ಅಸ್ತು ಸೂರ್ಯಃ |
ಮಾಧ್ವೀರ್ಗಾವೋ ಭವಂತು ನಃ ||

ನಮ್ಮ ಸುತ್ತ ಇರುವ ಎಲ್ಲಾ ಗಿಡಮರಗಳು ನಮಗೆ ಅಮೃತತುಲ್ಯವಾದ ಹಣ್ಣು-ಕಾಯಿಗಳನ್ನೂ, ಔಷಧಗಳನ್ನೂ ನೀಡುವಷ್ಟು ಸಶಕ್ತವಾಗಲಿ, ನಮ್ಮ ನದಿ-ತೊರೆ ಜಲಾಶಯಗಳು ಸದಾ ತುಂಬಿರಲಿ,ನಮ್ಮ ಗೋವುಗಳು ಸದಾ ಕ್ಷೀರ ಸಮೃದ್ಧಿಯನ್ನೀಯಲಿ, ದಿನಬೆಳಗುವ ಭಾಸ್ಕರ, ನಮ್ಮೆಲ್ಲರ ಮಿತ್ರ ಸೂರ್ಯ ನಮಗೆ ತನ್ನ ಔಷಧೀಯ ಕಿರಣಗಳನ್ನ ಸೂಸಿ ಹರಸಲಿ, ಒಟ್ಟಾರೆ ನಮ್ಮ ಜೀವಿತಕ್ಕೆ ಬೇಕಾಗುವ ಎಲ್ಲಾ ಕಸುವು-ಸುಖ-ಸಂಪತ್ತನ್ನು ಭಗವಂತ ಕರುಣಿಸಲಿ ಎಂದು ಮನಸಾ ಭಗವಂತನಿಗೆ ಜೇನುತುಪ್ಪದಿಂದ ಅಭಿಷೇಚಿಸಿ ಸಂಪೂರ್ಣ ಪಂಚಾಮೃತವನ್ನೆರೆದು, ಷೋಡಷೋಪಚಾರಗೈದು ಸಂಪೂರ್ಣ ಫಲದ ಹರಿವಾಣವಿಟ್ಟು ನಿವೇದಿಸಿ, ಮಂಗಲಾರತಿಯೆತ್ತಿ ತಮ್ಮೆಲ್ಲರ ಪರವಾಗಿ ಕವಿ ಜಗದಮಿತ್ರ ಪ್ರಾರ್ಥಿಸಿದ್ದಾನೆ -

ವಸುಧೈವಕುಟುಂಬವೆನ್ನದು ನಮ್ಮೊಳಗಿರ್ಪ
ಕೆಸರತೊಳೆಯೆನುತ ಶಿವನನು ಧ್ಯಾನಿಸುತ
ವಸುಧೆಯೋಳ್ ಪಂಚಾಮೃತವಿತ್ತು ತಾ ಬೆಳಗಿ
ಹಸನುಮಾಡೈ ನೀನು | ಜಗದಮಿತ್ರ

14 comments:

  1. ಹೊಸ ವರುಷ ಇನ್ನಷ್ಟು ಹರುಷವನ್ನು ತರಲಿ.
    ನಿಮಗೆಲ್ಲರಿಗೂ ಹೊಸವರುಷದ ಶುಭಹಾರೈಕೆಗಳು.

    ReplyDelete
  2. ಚಿತ್ರಗಳು ಆಪ್ಯಾಯಮಾನವಾಗಿವ. ಶುಭಾಶಯಗಳು ನಿಮಗೂ. :)

    ReplyDelete
  3. ಯುಗಾದಿಯ ಶುಭಾಶಯಗಳು
    ನಮಗೂ ಸ್ವಲ್ಪ ಬೇವು ಬೆಲ್ಲ ಕಳಿಸಿಕೊಡಿ ಸ್ವಾಮಿ!

    ReplyDelete
  4. ನಿಮಗೆಲ್ಲರಿಗೂ ಯುಗಾದಿಯ ಶುಭಹಾರೈಕೆಗಳು....

    ReplyDelete
  5. ಕೂಸು ಮುಳಿಯಾಲ,ಮನಮುಕ್ತಾ, ಶಂಭುಲಿಂಗ,ಮನದಾಳದಿಂದ, ಸವಿಗನಸು ನಿಮ್ಮೆಲ್ಲರಿಗೂ ಹಾಗೂ ಭೇಟಿ ಇತ್ತ ಎಲ್ಲರಿಗೂ, ವಿಶ್ವದ ಸಮಸ್ತರಿಗೂ ಆರ್ಷೇಯ ಪದ್ಧತಿಯಂತೆ ನಿಮ್ಮೆಲ್ಲರ ಮನೆಗಳ ಮನಗಳ ಹತ್ತಿರ ಬಂದು ಯುಗಾದಿಯ, ಹೊಸವರ್ಷದ ಶುಭಾಶಯಗಳನ್ನು ಕೋರುತ್ತಿದ್ದೇನೆ, ಹೊಸವರ್ಷ ತಮಗೆಲ್ಲ ಸುಖ-ಸಮೃದ್ಧಿದಾಯಕವಾಗಿರಲಿ

    ReplyDelete
  6. ಪ್ರಿಯ ಭಟ್ಟರೆ,
    ನಿಮ್ಮ ಕವನ ಉಲ್ಲಾಸವನ್ನು ಹಂಚುತ್ತದೆ. ಜೊತೆಗೆ ನಮಗೆ ತರತರದ ಹಣ್ಣುಗಳನ್ನು ಬೇರೆ ಕೊಡಿಸಿದ್ದೀರಾ. ನಿಮಗೆ ಧನ್ಯವಾದಗಳು.

    ReplyDelete
  7. ನೀವು ನನ್ನ ಬ್ಲಾಗ್'ನಲ್ಲಿ ಯುಗಾದಿಯ ಶುಭ ಹಾರೈಸಿದ್ದಕ್ಕೆ ಕೃತಜ್ಞತೆ ಅರ್ಪಿಸುತ್ತಾ, ಈ ಉಗಾದಿಯು ಸರ್ವರಿಗೂ ಶುಭ ತರಲಿ ಎಂದು ಹಾರೈಸುತ್ತೇನೆ.

    ReplyDelete
  8. Wow..!!! ಹಲಸಿನ ಹಣ್ಣು ತಿನ್ನದೇ / ನೋಡದೆ 3 ವರ್ಷ ಆಯಿತು ಫೋಟೋ ಹಾಗು ಕವನ ತುಂಬಾ ಚೆನ್ನಾಗಿ ಮೂಡಿ ಬಂದಿದೆ..ನಿಮಗೂ ಕೂಡ ಹೊಸ ವರುಷದ ಶುಭಾಶಯಗಳು:)
    ನಿಮ್ಮ ಬ್ಲಾಗ್ ವೈವಿಧ್ಯಮಯವಾಗಿದೆ..ನಿದಾನಕ್ಕೆ ಬಂದು ಓದುತ್ತೇನೆ..

    ReplyDelete
  9. ಹೊಸ ವರುಷ, ತರಲಿ ಹರುಷ
    happy Ugadi
    :-)

    malathi and family

    ReplyDelete
  10. ಹಲವರು ಬಂದಿಹಿರಲ್ಲ ಬಹಳ ಸಂತೋಷ, ಬಂದು ತೆರಳಿದ ಗೌತಮ್, ಸುನಾಥ, ನಾರಾಯಣ ಭಟ್,ವನಿತಾ,ಮಾಲತಿ ಎಲ್ಲರಿಗೂ ಇನ್ನೊಮ್ಮೆ, ಮಗುದೊಮ್ಮೆ ಶುಭಾಶಯಗಳು

    ReplyDelete
  11. ಯುಗಾದಿಯ ಶುಭಾಶಯಗಳು. ಹೊಸವರ್ಷಕ್ಕೆ ಚೆ೦ದದ ಕವನ ಮತ್ತು ಜೊತೆಗೆ ಚೆ೦ದದ ಚಿತ್ರಗಳು. ಮನಸ್ಸರಳಿತು ಪ್ರಫ಼ುಲ್ಲವಾಗಿ.

    ReplyDelete
  12. ಸೀತಾರಾಮ್ ಸರ್, ಮತ್ತೊಮ್ಮೆ ಶುಭಾಶಯಗಳು ಮತ್ತು ಧನ್ಯವಾದಗಳು

    ReplyDelete